Старшыня Мінгарвыканкама Уладзімір Кухараў расказаў на сустрэчы з супрацоўнікамі тэлеканала ОНТ, калі мінчане перастануць скардзіцца на непрыемныя пахі ад ачышчальных збудаванняў.
Ачышчальныя збудаванні Мінска пабудаваны ў пачатку 1960-х, і іх рэканструкцыя – самае адчувальнае для жыхароў пытанне. Асабліва ў Ленінскім і Заводскім раёнах. Але закрыць усе збудаванні адначасова немагчыма, звярнуў увагу Уладзімір Кухараў.
– Рэканструкцыя – пытанне няпростае і сур’ёзнае: нельга закрыць усе збудаванні адразу. Працуем па чарзе: завяршаем адны ёмістасці, будуем іншыя. Думаю, усё павінна атрымацца, і мы ў 2028 годзе завяршым рэканструкцыю ў поўным аб’ёме. Цяпер усе адкрытыя ёмістасці накрываюцца, – заявіў ён.
Але ёсць і другая прычына пахаў – ілавы асадак. Гэта ўдзельнік працэсу ачысткі, дзякуючы якому сцёкі становяцца прыдатнымі для вяртання ў навакольнае асяроддзе. Штогод яго ўтвараецца больш за 200 000 тон. Цяпер ілавы асадак вывозяць за 80–90 кіламетраў ад Мінска – гэта дорага, і людзі там не вельмі задаволеныя, адзначае Кухараў.
– Таму прынята рашэнне пабудаваць завод па яго перапрацоўцы, будаўніцтва ўжо пачынаем, – расказаў ён.
Новы завод дазволіць высушваць і спальваць ілавы асадак, а атрыманую энергію выкарыстоўваць як электраэнергію.
Перадрук матэрыялаў CityDog.io магчымы толькі з пісьмовага дазволу рэдакцыі. Падрабязнасці тут.
